[ Indice ]
La Solombra
Taba na ponte sola, esperando
pola túa presencia, taba escura y trémbole; naguando pol tou ciñu. El
riéu ruxía como un diañu embaxo de min, las súas aguas xabaces continaban
chegando a la final del sou traxeutu, imparables, domeñadas, soxulgadas pol
vientu y la Hestoria. Y you siguía eillí quieta, sele, callada, esperando la
túa compaña.
Suañaba que me querrías que me darías amor y tú namái das duelgu, dende que
te conocí n’abriendo los güeyos, supie que tabas ehí continando xunta min la
vida que yera de miéu. Llercia, glayaba la túa mirada, llercia, axorízate
por que tou eiquí fou’l tou primer mensaxe; pero nun choréi nun yera pa
facelu, yá que sabía que cualaquier choru, cualaquier llamentu, cualaquier
llárima nun sería sinon un regalu innecesariu de desesperación pa cola vida.
Colos años llevantéime y tú siguístime, como lu que yeras, como una solombra
negada pa la muerta y trancada pa la vida. Acompangásteme, xurdiendo cola
lluz, morriendo cola nueite.
Lluitéi escontra de tou, lluitéi ensin dexare de suañare que cualaquier día
un rellumu faríate desapaecere y si qu’asina estu nun asocediéu, namái
siguisti al miéu llaú, produciendo risas, produciendo burllas, produciendo
duelgu. Esu yes tú namái, esu; duelgu, tres duelgu.
Chegóu’l tiempo de la brá, y eiquí tou sentada na ponte, sola, terriblemente
sola, pues tú yá chegasti, y meyor sería que más que viva tuvieras muerta;
ou you.
Miro'l riéu, colas súas aguas puras pero non pola súa inocente nacencia
sinon pola súa fuercia; baltiendo tou al sou pasu nun dexa nada suciu, la
súa anima nun ta empuercada como la túa. Y entóncenes comprendo, namái hai
una solución: la fuercia violenta que t'escachará de mi, que me purificará,
decátaste de la mía idega, nin te mueves nin dices nada namái como siempres
callada ensin pallabra ensin xuiciu, por que tú nun camientas nun xulgas,
tas ehí.
Llánzome a la fría blancura del riéu, abrázolu, somólguiome y comulgo con él
esperando la súa llibertá; yá nun te siento a la final llibre, ensin tí.
Saco la tiesta buscando l'aire prometíu, la briesa d'un nuéu bautismu, pero
tú siguis eilli, na ponte güeyándome impasiva xirándote al empar de mí,
caminando por enriba de la ponte mientre que you sou emburriada so ella.
Cuido que sólo hai una solución. pecho los güeyos, naguo por nun te ver
enxamás; rezo y pido la mía muerte pues cuando me sotierren tú yá nun tarás
conmigu; porque eillí nun hai nada, absolutamente nada.
Agora abro los güeyos y tengo una nueva vista, lluz, una claridá encesa como
un sol, que crucia tres unos barrotes y con duros güelpes pósanse na mía
cara, y tú siguis eillí, de pía a esti llau de la puerta trancada con un
pequeñu cristal, triunfante pero callada, quieta, y como siempres seirá.
