[ Indice ]
Puemas dende'l Órbigu
Alcuéntrome,
na nueche,
nesti escuru llar,
onde soi,
y averau’l moyau borrayu ensín calor,
acúchome a mí mesmu, nesti duru escañu,
frieu, de muertos sentires feichu,
asperando que las mías oreyas, d’oyire deixen.
A la oriella’l rieu foi,
nun feichizu caí you,
xana coloradina vi,
l’augua eillí paróu.
Enxamás dixi una vé,
cumu inxenua trucha foi
un mordí sólu una vé,
na sua rede apaecí.
Ocas del fondu encadenan el mieu volador pensamientu,
entre las piedras lu apriesan sin soltalu ni un momentu.
Eilla, ¿cúmu? ¿cúmu fizu estu? ¡Dime cúmu! ¿Cúmu fizu estu?
Ye que s’afuegan nel fondu
corazón y pensamientu,
nesti rieu d’amor,
que los tapa por enteiru.
¡Ayudái si puedes xana!
Eilla, ¿cúmu fizu esto?
El sangre ya nun camina,
nos regueiros del mieu cuerpo.
Nun ye mas qu’outra.
Esta. Una. Outra.
Nueche na que la frustración sal,
y el alma por esti pleniluniu alterada,
descansar quier nun vacíu onde nun s’afaye.
Conos güeyos cierros, cona llave’l pasivu suicidiu,
que la mata,
en sin, enxamás querer espertare.
Nun ye mas q’outra.
Esta. Una. Outra.
Nueche d’esfambriaos amores,
Onde’l pensamientu afuega,
los últimos intentos del cuerpu llevantare.
Y morrere se deixa.
Nun ye mas qu’outra.
Esta. Una. Outra.
Duermo.Iviernu. ¡Ta pechau!
¡Y outra vé la primavera finca un rayu sol nos mieus güeyos!
Ye l’espeyu, eilla, tu,
de lo que dende eiquí you proxecto.
Y unos toixos mariellos cumu güesos,
de mi rápido prenden,
debaxo la piel esfarrapan,
y muerden a mi, recordando a nos,
nesta niñez olvidada,
lo que los dientes de la vida dixorun
cuando eillos,
nesti cortu iviernu,
primavera ñegra pola primera vé deixorun.
Y una pega viva,¡ Fincóume’l sou picu na tiesta!
¡Ah! ¡Espierta cóime!
Y el mieu muertu llatir casi enturau yá enteiru,
partiou-ye los fucicos al sou xelu,
cona fuercia d’outros xuntos que viniorun.
Y la pega, esa pega que va y vien, y qu’un home......
Pega, urraca, urraca,¡pega!
¡Nun s’olvide!
Pega, ¡quedai pega!
¡Nun nos deixes sólos pega!
¿Cun quién, de qué, cúmu falar si marchas pega?
Fincaste, fincas. Nos espertasti.
El ser, ya somos. Afayada.
Y al traernos el respetu.....¡Tu!...esperanza d’autoestima.
Cuando el tou besu recueya la miea bouca,
brincarán las alarmas del mieu ego,
al caer del sou llau la balanza.
Y la tou gota, ¡tou mar!, cogüelmará’l mieu vacíu vasu.
¡Non!¡Non!¡Non!
¡Si! ¡Si! ¡Si!,,,,,,,,¡Non! ¡Nada!
¡Non! ¡Perdón nun habrá pa esti poucu sere!
¿Qué sere? ¿Soi? ¡Ja!
