[ Indice ]
NESTAS DATAS TAN SEÑALAS
Perfeutu entamóu apurrise. Ou non, pue que nun tuviera seguru. Cabaeiramente nun taba seguru de munchas cousas que-y pasaban. Onque, si aqueillu nun yera despertare, polu menos paecía-yse munchu.
Porque deixaba de tar comun mediu inconsciente ente’l golor a cuchu –un golor narcóticu y caliente supurau polas rendixas, ente las maderas y los yerbaxos- y entamaban a llabrare las suas entendederas sucos estreitos de lluz: surdían lonxe alcordanzas que paecián tar sepultadas ente llamazares d’ angustia y desconsuelu durante eones de tiempo, faixes de sentíu aprisionau pur una soledá que yera enorme comu un cumbral y tenía vetas de lloucura y d’ incompresión crónica.
Y onde enantes sólu había escuridá, agora titilaban puntos lluminosos y vacilantes comu cocus de lluz feridos. Ël creyía perseguire durante dalgún tiempu a esas borboyas fulgurantes, comu desllumbrau pola sua presencia de sópitu en mediu de aqueilla endiablada nueche ensín fin. Y en ca una dèillas atopaba dalgu que-y yera familiar y propiu; fuera lu que fuera, dolorosu ensín dubia, una alcordanza tan fuerte que-y oprimía los bofes y quemaba-y el corazón llegába-y al bandullu, y más allá tovía, más dientru tovía.
Nuna viéuse a sí mesmu de guaje, xugandu a la maya pur ente las caleyas del pueblu, al atapecer. Llegaba dempués, casi xustu cuandu los chamaban las suas mais pa cenare, un crepúsculu cálido, estrellau, increíble…
N’ outra taba con outros rapaces, matandu a pedradas un sapu. Y n’outra, una moza vendába-y la manu magullada, al rodiu d’eillos xiraban la era y la trilla, povisa y calor, y sol, un sol redondu comu una gran bandorga de gatu rubiu….
Y n’outra, n’ outra taba sofitandu al comité comarcal a colocar carteles nos qu’ apaecían llabradores fermosos con munchas espigas mariellas nun brazau, y caminaba por una campa verde y al sou llau taban un intelectual, un obreru y un artista….
Outros globos yeran grandes y escuros, comu inflaos por un gas venenosu. N’ eillos adivinábanse paisaxes de montes prietos, de trochas barridas a fuegu, de cuetos escabezaos pol morteru y la metralla. Los nublones taban fechos d’ angustia y na visión apecía él mesmu, Perfeuto, corriendu col mieu mordiéndu-y el gargüelu comu una culuebra, a traviés del monte, percorriendu camperas y brañas, corriendu, siempres curriendu, intentandu atopare’ l sou pueblu, sangrandu, sudandu, sintiendu que ca movimientu d’ un matu, ca, ulular d’una curuxa, yera ‘l mesmu enemigu llistu pa day el tiru mortal.
A veces había munchos d`esos rellampagueos, outras mui poucos, o nengunu, y sumíase nuna negrura que sólu facía tremar los movimientos bruscos y carnosos de las vacas, allá enriba na cuadra , enriba de las tablas, enriba d` él.
Eillí onde permaneciera, día tres día, diez llargos años, tan solu saliendu, comu muertu en vida, como güestia, dalgunas nueches. Entós movíase con dificultá sobru las llouxas, temblandu, ensín dar tiesta de cuantu pasába-y, falandu malpenas cuatru pallabras absurdas, trascamundau el sentíu.
De sópitu, nelsou piqueñu infiernu ¡, n’aquella sua casina na que por compaña solu tenía a las forcadiella, a las formigas, a las aviespas, a las abeyas, a los taxanes y a los llimacos, golió dalgu: castañas….¡y manzanas asadas! Salía de la cucina….
Y cayóu na cuenta .
¡NADAL!
¡OUTRA VEZ, NADAL
